Eusko Legebiltzarrak ekimen bat onartu du gaur Eusko Jaurlaritzari eskatzeko izapidetu eta onar dezala 2024. urtea amaitu baino lehen energia berriztagarriko instalazioak Euskadin hedatzeko plana, eta behin betiko onarpena 2025eko lehen seihilekoan gauzatu dadila, prozesuan inplikatutako organoen izapidetze-epeak arinduz. EAJ-PNVk eta PSE-EEk EH Bildurekin adostutako testuak kontuan hartu du aurkeztutako alegazioak dagoeneko ebatzi direla, eta Industria, Trantsizio Energetiko eta Jasangarritasun Sailari eskatu dio Energia Berriztagarrien LAPa onartzeko, jasangarritasunaren printzipioak bere forma guztietan errespetatuz: ingurumena, gizartea eta prozedura.

Eusko Jaurlaritza 2021etik ari da Energia Berriztagarrien LAPean lanean, jasangarritasun energetikoa lortzea ahalbidetuko duen lurraldea antolatzeko oinarrizko tresnetako bat izan dadin. Planak beharrezko energia berriztagarrien instalazioak hedatzea ahalbidetuko du, ekonomiaren deskarbonizazioarekin amaituko den trantsizio energetiko hori egin ahal izateko.

Gorka Alvarez EAJ-PNVko legebiltzarkideak azpimarratu du trantsizio energetikoa atzeraezina dela eta trantsizio horrek energia-iturri berriztagarriak aprobetxatzeko instalazioak Euskadin hedatzea eskatuko duela. "Hedapenak handiagoa izan beharko du nahitaez datozen urteetan, Euskadi Europako batez bestekoaren azpitik baitago oraindik iturri garbietatik sortutako energia-kontsumoari dagokionez. Hala ere, abiadurak ez du zorroztasuna edo adostasuna ordezkatu behar. EAJ-PNVk trantsizio energetiko sendo bat defendatzen du, urrats sendo eta ondo neurtuekin aurrera egingo duena ", azpimarratu du jeltzaleak.

Alvarezek defendatu duenez, instalazio berriak ezartzeak ingurumen-eskakizun guztiak bete beharko ditu, bai eta kultura-ondarea, ingurune sozioekonomikoa, segurtasuna eta osasuna zaintzeko errespetua ere. "Jasangarritasuna ez da energia berriztagarri gehiago izateko helburua soilik. Energia hori pertsonen eskubideak arriskuan jarri gabe ezartzea ere esan nahi du, gure paisaia eta landa-komunitateak suntsitu gabe ", nabarmendu du.

Bestalde, Itxaso Asensio legebiltzarkide sozialistak nabarmendu duenez, sozialistek "trantsizio energetiko justua egitearen alde egin dugu beti, ingurumenean, jasangarritasunean eta pertsonengan pentsatuz. Denok batera aurrera eginez eta inori eta ezeri kalterik egin gabe". "Gure eredu energetikoa tokikotasunetik eta energia berriztagarrien iturrien bidez aldatu behar dugu, eta orain aprobetxatu beharreko aukera handia dugu. Azkar egin behar dugu, baina ondo", gaineratu du.

Asensioren ustez, "agerikoa da gure lurraldean instalazioak eta energia-ekoizpena nabarmen handitu behar ditugula, baina presak ezin du eragin instalazio horiek edozein modutan egitea; aitzitik, "plan zehatz bat behar dugu, energia berriztagarrien hedapena modu ordenatuan egingo dela bermatuko duena, iraunkortasuna eta ingurumenaren babesa kontuan hartuta, azken finean, ezarritako ingurumen-neurriak betez".