Eusko Legebiltzarrak sei lege onartu ditu gaur Gasteizko Ganberan egindako bilkuran. Lege ekoizpen garrantzitsu horri esker, EAJ-PNVk eta Iñigo Urkullu lehendakariak gidatutako Eusko Jaurlaritzaren Legegintzaldi Plana betetzen jarrai daiteke, eta lehen mailako tresnak eskainiko dizkio Euskadiri Hezkuntza, Enplegua, Datuen Babesa edo Hirigintza bezalako gaietan etorkizuneko erronkei aurre egiteko. Legebiltzarrak oniritzia eman die Hezkuntza, Enplegu, Datu Pertsonalen Babes, Finantzen Euskal Institutu, Dirulaguntzen araubidea arautzen duen Lege eta Lurzoru eta Hirigintza Legearen aldaketari.

Autonomia, profesionalizazioa, bidezko eskolatzea

Hezkuntza Legeak garrantzi berezia zuen, zalantzarik gabe, gaur Ganberan eztabaidatu den gai-zerrendan. Izan ere, Hezkuntza Sailak bultzatutako Araua aurrera atera da lan-fase oso bizi eta luze baten ondoren. "Legeak duela urtebete baino gehiago Legebiltzarrean lortutako hezkuntza-itunari erantzuten dio", adierazi du Gorka Alvarez legebiltzarkide jeltzaleak, Hezkuntza arloko talde parlamentarioaren arduradunak, "eta hainbat kontzeptu azpimarratzen ditu, hala nola inklusioa, pertsonak eta balioak, gobernantza partekatua, sistemaren ikuspegi estrategikoa eta hezkuntza-eraldaketa, Bildarratz sailburuak bere garaian azpimarratu zuen bezala".

Lege berria aurrerapausoa izango da Euskadiko sektorearentzat, autonomia handiagoa eskainiko die ikastetxeei, Hezkuntzako Euskal Zerbitzu Publikoaren figura jasoko du, zuzendaritza-taldeen profesionalizazioa bultzatuko du, bidezko eskolatzea azpimarratzen du bereizketaren aurka borrokatuz, hezkuntza-sistema osoaren etengabeko ebaluazioa gaituko du eta helburu objektiboak ezarriko ditu hizkuntzak ikasteko: ikasleek B2 bat lortuko dute euskaraz eta gaztelaniaz Bigarren Hezkuntza bukatzeaqn eta B1 atzerriko hizkuntza batean. Eta garrantzitsuagoa dena, zentroei horretarako tresnak emango dizkie.

Kalitatezko enplegua

Enpleguari buruzko Legea ez da denbora eta ahalegin gutxiagotan landu. Kasu horretan, arauak "Euskadik enpleguaren arloan dituen beharrei erantzungo die, eta Eusko Jaurlaritzak legegintzaldiaren hasieran bere gain hartutako konpromisoak betetzea ekarriko du. Ideia nagusi bat azpimarratu beharko banu, Legeak azpimarratzen duen kalitatezko enpleguaren aldeko apustua izango litzateke. Enplegua handitzeaz gain, enpleguaren kalitatearen alde egingo du: prekarietatea murriztuko du, emakume gehiago sartzea jarduera ekonomikoan, eta gazteei eta iraupen luzeko pertsonei lan-merkatuan sartzen lagunduko die. Enplegu-tasa igotzetik kalitatezko enpleguaren aldeko apustua egitera igaro gara", azaldu du Jon Aiartza EAJ-PNVko legebiltzarkideak. Legea, gainera, "Urkullu lehendakariaren hauteskunde-programan jasotzen zen printzipioari buruz egin da, lehen herrialde-konpromiso gisa ezartzen baitzen: kalitatezko enplegua bizi-proiektuaren egitura-ardatz gisa", gogorarazi du.

Datuak Babesteko Euskal Agintaritza

Gasteizko Ganberan egindako osoko bilkurak Datuak Babesteko Euskal Agintaritzaren Legeari argi berdea emateko balio izan du. Arau horrek aukera emango du Euskadiko sektore publikoaren ardurapeko datu pertsonalen tratamenduaren kontrola eta ikuskapena arautzeko, eta Datuak Babesteko Euskal Bulegoa mantentzearen eta indartzearen aldeko apustua egingo du, zeina Datuak Babesteko Euskal Agintaritza bihurtuko baita. "Horrek bere gaitasunak eta eskumenak zabaltzea ahalbidetuko du", azaldu du Gorka Alvarez EAJ-PNVko legebiltzarkideak. "Tresna honek etorkizuneko erronkei ahalik eta ondoen aurre egiten lagunduko digu, herritarrentzat hain delikatua eta konplexua den gai honetan". Funtzio berri horien artean, Agintaritzak ikuskapenak egin ahal izango ditu eta zehatzeko ahalmena izango du.

Lurzorua eta Hirigintza

Elena Lete legebiltzarkide jeltzaleak nabarmendu duenez, Lurzoruari eta Hirigintzari buruzko ekainaren 30eko 2/2006 Legearen aldaketa onartuta, euskal hirigintza-antolamenduak lurralde- eta gizarte-eremuan dituen arazoei erantzun nahi zaie, bai eta udalei beharrezko tresnak eman ere lurraldearen bizkarrezurra osatzeko eta hirigintza-antolamenduaren eta gizarte-kohesioaren helburuak betetzeko erantzun egokiak eskaini eta emateko. "Legeak hirigintza-antolamenduko tresnak eta teknikak hartu, antolatu eta eskaini behar ditu, bereziki udalei, segurtasun-esparru juridiko egonkor eta integratu bat izan dezaten", ziurtatu du Letek.

Finantzen Euskal Institutua

Gaur onartu den beste puntu garrantzitsu bat Finantzen Euskal Institutuaren Legea izan da. Horri esker, organo horren jarduera-eremua zabaldu ahal izango da, Euskadiko enpresek lurraldetik kanpo merkatuak zabaltzeko egiten dituzten jarduerei estaldura eman ahal izateko. "Halaber, pertsona fisikoei finantzaketa edo abala ematea ahalbidetuko du, Eusko Jaurlaritzaren politika sektorialen esparruan", azpimarratu du Alaitz Zabalak. Legebiltzarkide jeltzaleak oposizioko taldeekin onartutako edo egindako zuzenketak izan ditu hizpide hitzaldian. "Euskararen erabilerari, Administrazio Kontseiluaren osaerari eta gardentasunari, publizitateari eta kontu-emateari buruzko artikulu berri bati buruzko ekarpenak dira", aipatu du. Azken batean, lege garrantzitsu bat hobetzea.

Euskadiko Dirulaguntzen Legea

Halaber, Euskadiko Dirulaguntzen Legea onartu da, Euskal Autonomia Erkidegoko laguntza publikoen banaketa arautzen duena eta herrialdean instalatutako enpresen sustraitzeari eusteko hainbat neurri jasoko dituena. "Produkzioa gure autonomia-erkidegotik kanpo eramaten duten enpresei laguntza publikoak eta dirulaguntzak kentzea planteatu da", adierazi du Alaitz Zabala EAJ-PNVko legebiltzarkideak.

"Legeak egiterakoan, herrialdearen lehiakortasunari eragin gabe egin behar dugu", gogorarazi du, eta hori kontuan hartu da arau hau egiterakoan. "Enpresak Bizkaiko eta Arabako Aldundietan Foru Arau gisa errotzea defendatzeko neurriak bagenituen. Orain beste urrats bat egingo dugu Lege honekin horrelako tresnak sendotzeko", laburbildu du Zabalak. Legebiltzarkide jeltzaleak nabarmendu duenez, "taldeek egindako ekarpenek Araua aberastu dute, eta bertan hirugarren sektorearen edo Lehiaren Euskal Agentziaren proposamenak eta erreklamazioak ere jasotzen ditugu".