Eusko Legebiltzarraren Osoko Bilkurak Euskadiko Gazteriaren lehen Legea onartu du gaur, akordio zabal batekin. Arau horren bidez, bereziki krisiaren ondorioak jasaten ari den kolektibo baten bizi-baldintzak eta etorkizuneko planak hobetu nahi dira. Maialen Gurrutxaga legebiltzarkideak esan duenez, lege honek gazteen eskubideak finkatzen eta zabaltzen ditu, eta bere helburua bizi-proiektuak garatzea da. “Laneko, etxebizitzako, emantzipazioko eta desberdintasuneko arazoak. Erabat gauzatzea eragozten duten oztopoak. Arau honek, euskal gazteriarentzat berariazkoa den lehenak, hain zuzen ere, ziurgabetasun eta zailtasun horiek guztiak kentzeko babesa eta beharrezko neurriak eman nahi ditu”.

Lege berriaren xede diren pertsonen adina 12 eta 30 urte bitartekoa da. Azpimarratzekoa da, Gurrutxagarentzat, adingabeen denbora librea eta aisialdi hezitzailea arautzen hasiko baita, hezkuntza osoagoa lortuz. “Adin goiztiarrez ari gara, non gazteenak hezkuntza formaletik kanpoko ingurune bat sortzen hasten diren. Eskolatik kanpo balio komun batzuk ezartzea eta horiek aisialdira eramatea garrantzitsua iruditzen zaigu norbanakoaren prestakuntza eta hazkunderako. Eremu osagarri hori araututa, hezkuntza osoagoa ere lortzen da”.

Gurrutxagak azpimarratu du oso garrantzitsua dela gazteen iritzia jasotzea eta erabakiak hartzerakoan aintzat hartzea, haiek beren historiaren protagonista izan daitezen. “Beraien lekua eskatzen dute gizartean, eta lege hau iristen da merezi duten espazio hori emateko. Erakundeekin komunikatzeko bideak indartuko dira, inplementatu beharreko politika, plan eta ekintza zehatzen diseinuan aktiboki parte har dezaten”, esan du.

EAJ-PNVko ordezkariak aitortu du legea ez dela “dena konponduko duen makilatxo magikoa izango”; egiturazko arazo asko daude eta beste aldaketa batzuk behar dira, baina lege honek etorkizuneko plan bat eraikitzea ahalbidetzen du, non gazteak protagonista diren. Helburu zehatzak eta gazteen autonomia eta emantzipazioa bultzatzeko ekintzak dituen plana. Hala, arauaren ardatzetako bat da emantzipatzeko batez besteko adina bi urte jaistea eta 28 urte izatea, horretarako etxebizitzaren, prestakuntzaren, lan-merkatuaren edo laguntzen arloetan lan eginez. “Gazteak borrokalariak dira, ametsak dituztenak, kontzientzia solidarioa dutenak eta ondo prestatuta daudenak. Itxaropen bat eman behar diegu. Gaur egun, lege honen bidez, puntu eta jarraipen bat jartzen diegu Herri honetan urteetan garatu diren politika publiko guztiei, eta gazteekin dugun konpromisoaren puntu eta jarraipen bat da. Etorkizuna dira, baina oraina ere bai, eta gaurtik aurrera tresna berriak izango dituzte beren bizi-proiektuak aurrera eramateko”, bukatu du.