Itxaso Berrojalbiz EAJ-PNVko legebiltzarkideak deitoratu du Europako funtsak "moteltzen" ari direla Euskadira, eta dagokiona baino askoz gutxiago. Berrojalbizek gobernu zentralari eskatu dio tramitazioa eta baliabideen banaketa bizkortzeko “izan ere, hau gertatzen ez bada”, ohartarazi du ez dutela espero zen ondorio eraldatzailerik izango ekonomian eta enpresetan. “Ez dut gure kezka ukatuko, ez bakarrik Euskadiri baliabideak esleitzea populazioaren edo BPGaren ehunekoan dugun pisua kontuan hartuta legokigukeena baino txikiagoa delako, baita esleipen eta banaketa horretan ikusten ari garen moteltasunagatik ere. Presarik eza horren ondorioz, baliabideak ez dira behar bezain azkar iristen euskal enpresa-sarera, eta, beraz, ez dituzte lortzen lortu nahi diren helburu eraldatzaileak”.

Pedro Azpiazu Ekonomia eta Ogasuneko sailburuak Batzordean egindako agerraldian, bozeramaile jeltzaleak agerian utzi du, gai konplexua izan arren, alderdi batzuk hobetu daitezkeela funtsen tramitazioa eta kudeaketa bizkortzeko. Hala, autonomia-erkidegoek erabakiak hartzean aktiboki parte hartzea eskatu du, elkarrizketa eta benetako kogobernantza-eredu bat bultzatuz. “Gure asmoa da baliabide horiek guztiak Euskadira iristea, haien kalitatea kontuan hartuta eta, gainera, gure herri-estrategian duten isla kontuan hartuta. Eta berriro diogu beharrezkoa dela komunitateak partaide aktibo izatea planen diseinuan eta definizioan. Guztion artean lan egin dezagun ahalik eta baliabide-bolumen handiena lortzeko. Ezin dugu aukera hau pasatzen utzi”.

Berrojalbizek uste du oraindik atera ez diren “deialdiek” errespetu handiagoa izango dutela Euskadiri dagokionarekin, eta herrialde gisa ekiteko prest gauden eraldaketa handiei erantzutea: eraldaketa teknologiko-digitala, energetiko-ekologikoa eta gizarte- eta osasun-arloa. “Euskadi egoera onean dago. Eginbeharrak eginda eta proiektuak aurkeztuta. Baina deialdi garrantzitsuenak berehala ateratzea behar dugu. Konfiantzazko botoa ematen dugu, eta espero dugu deialdi handi horiek deitzen direnean Euskadik benetan dagokiona jasotzea”.