"Gaur egun bizi dugun errealitatea, terrorismorik gabeko gizartea, ez litzateke ulertuko indarkeriaren aurrean erantzun baketsuarekin mobilizatzen hasi ziren pertsona eta elkarteen konpromiso irmoa, eskuzabaltasuna eta etengabeko lana gabe". Hitz horiekin, Iñigo Iturrate legebiltzarkide jeltzaleak jardunaldi honen helburua adierazi nahi izan du, aurten ere, Memoriaren Eguna ospatzeko. Eusko Legebiltzarrean, Iñigo Urkullu lehendakaria eta Bakartxo Tejeria Ganberako presidentea buru zirela, lore eskaintza egin da eta bi minutuko isilunea egin da.

Eusko Jaurlaritzak jardunaldi hau ospatzeko aukeratu duen leloarekin bat eginez (Bakearen alde egin zenuten guztioi, eskerrik asko. A todas las personas que os comprometisteis con la paz, ¡gracias!), terrorismoaren amaiera lortzeko mugimendu bakezaleen zeregin "erabakigarria" aldarrikatu du Iturratek. "Terrorea gizartean kokatuta zegoenean, ETAren berunezko urteetan, kontzientzia soziala astindu zuten eta herritarrak kalera ateratzera eta indarkeria terroristaren gaitzespena eta biktimei babesa adieraztera animatu zituzten". Gaur, gainera, eskerrak eman nahi dizkiegu, eta aitortu nahi dugu gaur hemen gaudela beren inplikazioagatik eta konpromisoagatik.

Legebiltzarreko Giza Eskubideen Batzordeko bozeramaile eta ordezkari jeltzaleak terrorismoaren zentzugabekeria eta bere ekintzen bidegabekeria berretsi ditu, eta "bizitzeko eskubidearen gainetik dagoen arrazoirik eta helbururik" inoiz ez dela egongo esan du. "Giza eskubideen urraketen zentzugabekeria argi eta garbi salatzeko eta iraganeko akatsak ez errepikatzen lagunduko digun memoria kritikoa eskatzeko eguna da gaurkoa. Sufritu duten pertsona guztiei zor diegu. Gaur gertatu zena bidegabea izan zela esateko eguna da, eta ez zen inoiz gertatu behar". Zentzu horretan, iraganaren berrikuspen kritikoa egitea "erabakigarria" dela esan du; egindako mina aitortzea eta norberak gaizki egindakoa onartzea. “Ezin dugu orain artekoak ahaztuta barriren barri hasi. Betebehar etiko bat dugu biktimen eta haien familien aurrean eta belaunaldi berrien aurrean. Inolako terrorismo motarik legitimatuko ez duen memoria plurala eta inoiz errepikatu beharko ez den iraganeko horri buruzko memoria kritikoa eskatzen ditugu. Giza eskubideen edozein urraketak beti izango du gure gaitzespena eta aurkakotasuna".