Joseba Egibar, EAJ-PNVko bozeramaileak, alderdi politikoen ilegalizazioak oinarrizko eskubideak urratzen dituela salatu du. “Ilegalizazioek ez dute ezer onik egiten eta Herri honetako elkarbizitza zapuzten dute” gehitu du.

 

Normalizazio politikoa bideratu nahi bada, alderdi politikoen ilegalizazioak ez duela inolako zentzurik azpimarratu du Egibarrek eta, beraz, Alderdi Politikoen Legea indargabetzea eskatzea Gasteizko Ganbarari dagokiola nabarmendu du. “Indar polítiko guztien ardura den arren, Legea bultzatu eta indarrean jarri zutenek dute erantzukizun nagusiena berau indargabetzeko” zehaztu du Euzko Abertzaleak Legebiltzar Taldearen bozeramaileak. “Inork pentsatzen al du gizartearen zati baten ordezkaritza aintzat hartzen ez bada normalizazio polítiko sinesgarririk bidera daitekeenik?” galdetu du buruzagi jelkideak. “Herri ordezkaritza izateko eskubidea gaude defendatzen, oinarrizko printzipio demokratikoa, hain zuzen” gehitu du.