Eusko Legebiltzarrak atzera bota ditu hainbat taldek aurrekontuen proiektuari aurkeztutako osoko zuzenketak. Kontuak abenduaren 22ko Osoko Bilkuran Eusko Jaurlaritza babesten duten taldeen oniritziarekin aterako dira aurrera, eta 15.025,4 milioi euro izango dira. Eta, orduan, Euskadik anbizio handiko aurrekontua izango du, euskal herritarren beharrei erantzuteko diseinatua. Kontu hauek aukera emango dute zerbitzu publikoak eta gobernu-programa burutzeko tresna bermatzeko.

Alaitz Zabala EAJ-PNVko legebiltzarkideak Gasteizko Ganberan egindako Osoko Bilkuran azpimarratu duenez, Eusko Jaurlaritzako Ogasun Sailak egindako Aurrekontu Proiektuak "pertsonak erdigunean" jartzen ditu eta Euskadiren etorkizuna bermatzea ahalbidetuko du. "Funtsezko sei helburu dituzte: pandemiaren eta bizi dugun egoera globalaren ondoriozko susperraldi ekonomikoa sustatzea; garapen ekonomikoa eta kalitatezko enplegua bultzatzea; gizarte-politikak blindatzea, batez ere osasunaren, hezkuntzaren eta etxebizitzaren arloetan; herritarren ongizatea eta bizi-kalitatea bermatzea; erronka demografikoari aurre egitea eta gazterian ardaztutako politika publikoak garatzea”. Alaitz Zabalak taldeei gogorarazi die Eusko Jaurlaritza "gogotsu, indartsu, ideiekin eta Gobernu Programa aurrekontu hauekin amaitzeko prest" dagoela.

Legebiltzarkide jeltzaleak azaldu duenez, Aurrekontuak onartuta izatea edozein politika publiko gauzatzeko edo burutzeko oinarria da, eta, Kontu horiek, zehazki, 2020-2024 Gobernu Programa amaitzeko aukera emango dute, "lortu gabe ditugun herri erronkei erantzunez. Lehendakariak zioen bezala, anbizio handiko programa bat dugu, eta hori lortzeko anbizio handiko aurrekontu bat proposatzen dugu ".

Bere hitzaldietan, Alaitz Zabalak aurrekontu-proiektuaren ildo estrategiko nagusietako batzuk jarri ditu mahai gainean, hala nola zerbitzu publikoak mantentzera eta hobetzera bideratutako partidak (kontuen %76 horretara bideratuko dira), bereziki Osasunean, Hezkuntzan edo berdintasun-politiketan eraginez, sektore estrategikoak ahaztu gabe, hala nola jasangarritasuna, euskara, berdintasuna, ikerketa edo inbertsioak.

EAJ-PNVren talde parlamentarioak ere Gasteizko Ganberan egindako bilkura baliatu du oposizioari ikuspegi zabala eskatzeko. Horrela, Alaitz Zabalak "seriotasun handiagoa" eskatu dio Alderdi Popularrari, "ez baita serioa 330-350 milioi euroko proposamenari proposamen alternatiboa deitzea, eta ez da serioa urtero zergak jaistea proposatzea, ezta gure irrati telebista publikoari izen ona kentzea ere". Podemosi, berriz, "orokortasunei buruz hitz egitea" egotzi dio.

“Lehendakariaren apaltasun eraginkorra”

Joseba Egibar EAJko bozeramaileak ere hartu du hitza, EH Bilduk aurkeztutako osoko zuzenketari erantzuteko. Egibarrek bere diskurtsoan, koalizio abertzaleko ordezkariei leporatu die agortzaileak, etsigarriak eta astunak direla, egiarekin bat ez datorren errealitate bat marrazten duena. Hala, datuekin eta ekintzekin erantzun die EH Bildu eta antzeko sindikatuek, osasun, ekonomia, lan baldintza, zaintza, hezkuntza eta beste hainbat alorretan egindako kritikei.

Egibarrek, gainera, Lehendakariaren “apaltasun eraginkorra” azpimarratu du “askoren harrokeriaren” aurka. Eta EH Bilduri esan dio: “zuekin bada, hobe. Baina bestela, zuekin edo zuek gabe herri honek aurrera egingo du”.