EAJ-PNVko legebiltzarkide Elena Letek aldiriko lineen transferentzia eskatu du, baita Espainiako Gobernuak oraindik urratzen dituen linea guztien transferentzia ere, euskal autogobernua lehentasuna baita Euzko Alderdi Jeltzalearentzat, eta, gainera, Gernikako Estatutuak 1979an ezarri zuen bezala. “Jendeari ez zaio axola transferentzia non dagoen, baina guri bai, guretzat lehentasuna baita. Azken berrogei urteotan hori izan da, da eta izango da gure helburua. Trenen konpetentzia gurea da, Gernikako Estatutuak hala baitio, eta berreskuratu egin nahi dugu”, ziurtatu duenez.

Hala, ordezkari jeltzaleak nabarmendu du Eusko Jaurlaritza bultzatzen ari dela transferentziak etengabe eskatzen, eta horren adibide dela Espainiako Gobernuak urrian iragarri zituen aldirietako lineak. “Transferentzien egutegia adostu zenetik igaro diren bi urteetan, EAJ-PNVk argi eta garbi adierazi du hori dela bidea, transferentziak gauzatu egin behar direla eta Gernikako Estatutua betetzeko beste urrats bat eman behar dela”, esan du.

Legebiltzarkide jeltzaleak gogorarazi du, halaber, aldiroko lineen transferentzian, erkidegoz kanpoko hainbat alderditako erkidego barruko zerbitzuak aztertzen diren eta egungo trenbide-azpiegitura behatzen den transferentzia konplexua izanik, hainbat alderdi aztertu behar direla, hala nola, material ibiltaria, zerbitzua eskaintzeko behar diren langileak, Kupoan eta haren sisteman izan beharko lukeen finantzaketa eta eragin oro.

Ildo horretan, Letek Sanchez presidenteak lehendakariaren azken gutunari emandako erantzuna izan du hizpide. Gutun horretan, eskualdaketak desblokeatzeko aldebiko batzordea bultzatzeko hitzordua finkatu du. “Alderdi horiek guztiak ikertu eta aztertu behar dira orain, Eusko Jaurlaritzaren eta Espainiako Gobernuaren arteko negoziazio irekian. Negoziazio hori espero zena edo, gutxienez, nahi zena baino zailagoa eta motelagoa da”, bukatu du. 

EH Bildu eta Podemos, Madrilen

Elena Letek EH Bildu eta Elkarrekin-Podemos talde parlamentarioei ere aurpegiratu die Madrilgo Diputatuen Kongresuan horrelako aldarrikapenak gogo beroz ez egitea. “Eusko Jaurlaritzak ez du sustapen-ekintzarik behar, beti erabili du autopropultsioa Gernikako Esatutoaren eskumenak berreskuratzeko lan egiteko. Biok gonbidatzen zaituztet Madrilen aldarrikapen hau gogo berberaz egin dezazuen”, azpimarratu du.