“Gizarte aktiboagoa gizarte osasuntsuagoa da, eta, beraz, zoriontsuagoa. Jarduera praktikan inbertitzeak osasuna, bizi-itxaropen handiagoa, kultura, gizarte-kohesioa, iraunkortasuna, ekonomia, kirola, enplegua, turismoa, gastronomía…, hau da, gizarteko esparru guztiei eragiten die”. Rakel Molina legebiltzarkide jeltzaleak pozik hartu du Legebiltzarreko Osoko Bilkurak bizi-ohitura osasungarriak sustatzeko araua onartu izana, kirola adin tarte guztietara eta Lanbide Heziketara zabalduz, besteak beste.

“Bizitza aktiboa sustatzen dugu gizarte osasungarriagoa lortzeko, eta esparru juridiko berri bat sortzen dugu, ordezkatzen duen legeak 25 urteko historian izan dituen aldaketak islatzen dituena”, Molinak defendatu duenez. Sedentarismoa, adierazi duenez, gaur egungo gizartearen gaitz handienetako bat da.

Legea EH Bildurekin hitzartu da tramitazioan, eta genero-ikuspegia, kirol inklusiboa, indarkeriaren eta arrazakeriaren aurkako borroka eta herri-administrazioek kirola edo 0-6 urteko tarteko eskola-kirola sustatzeko duten zeregina indartuko ditu, aurreko arauak betzen ez zuena. Gainera, kirol txartel bakarra ahalik eta udalerri gehienetara zabaltzeko lan egingo da: Kirol Txartela Mugiment. Bere ezarpena 2017an hasi zen, gogorarazi duen bezala, eta gure herrialdeko edozein tokitan kirola egitea errazten du. Artikuluetan euskal selekzioen ofizialtasuna bultzatzea eta nazioarteko lehiaketetan parte hartzea ere jasotzen da.

Molinak EH Bildurekin partekatutako lana eskertu du, eta Elkarrekin Podemosen eta PPren oposizioa deitoratu du, “obsesio eta infantilismo” demokratikoengatik. “Gure borondatea beti da batzen jarraitzea eta, horregatik, ez dugu kontu arrarorik edo biraketarik egiten hauteskunde-kalkuluetan pentsatuz, beste talde batzuek egiten duten bezala. Izan ere, besteen botorik behar izan gabe, akordio batera iritsi gara, eta horri buruz, gaur egun kontra bozkatzen duten taldeen zuzenketa gehienak gehitu ditugu”.

Bizi-itxaropena kalitate onarekin handitzea herri-helburua da, amaitu du, eta ariketa fisikoa funtsezkoa da hori lortzeko. “Gaur onartu dugun legeak helburu horretara hurbilduko gaitu”.