EAJ-PNVko legebiltzarkide Maitane Ipiñazarrek Eusko Jaurlaritzak Emantzipaziorako Euskal Estrategiari buruz egindako lana goraipatu du; izan ere, Euskadiren egungo errealitatea kontuan hartzeaz gain, “euskal gazteek bizi duina, askea eta erabateko izateko dituzten beharrei erantzuten die”.

Ordezkari jeltzaleak gogorarazi du legegintzaldi honetan Eusko Jaurlaritzak konpromisoa hartu duela gazteen emantzipazioa bultzatzeko estrategia komuna definitu, landu eta koordinatzeko, eta bost ardatz nagusiak defendatu ditu: enplegua, etxebizitza, errenta, kohesioa eta erresilientzia.

Gazteen emantzipaziorako euskal estrategia asteazken honetan bertan aurkeztu dute Eusko Legebiltzarrean Jonan Fernandez Trantsizio Sozialeko eta Agenda 2030eko idazkari nagusiak eta Miren Saratxaga Gazteriako zuzendariak. Ildo horretan, Ipiñazar legebiltzarkideak nabarmendu du garrantzitsua dela enplegu duina edo errenta eraginkorra izatea emantzipazio-prozesu oro lortzeko. Aurkeztutako ekimenen artean, nabarmentzekoa da 13.500 enplegu sortuko direla 2023 eta 2024 urteetarako, gazteen enplegurako txoke-plan baten bidez, eta beste 14.000 lanpostu gehiago enplegu-programa orokorrei esker.

Emanzipa programa ere nabarmendu du Ipiñazarrek: hilean 300 euroko laguntzak, gehienez ere bi urtez, 25 eta 29 urte bitarteko gazteentzat. Azken hau bateragarria izango da Gaztelagun programarekin, “programa hau etengabe ari da egokitzen euskal gazteriak bizi dituen errealitateetara”.