Euzko Alderdi Jeltzaleak Europar Batasunak hartutako neurri guztiak babestu ditu, eta elkartasuna adierazi dio Ukrainako herriari laguntza humanitarioa bideratzeko eta emateko erabakian; eta, aldi berean, Eusko Jaurlaritzaren eta euskal erakundeen lana nabarmendu du, lehen egunetik modu koordinatuan lan egin baitute premiazko neurriak hartzeko eta gerrak giza terminoetan edo sozioekonomian dituen ondorioak arintzeko.

Ostegun honetako osoko bilkuran, Iñaki Aguirre legebiltzarkide jeltzaleak nabarmendu du EAJ-PNVk beti egin duela bakearen, askatasunaren eta demokraziaren alde, baina ez edozein modutan. Horrela, "Duintasuna eta giza eskubideak” jarri ditu aurretik, eta betiere “demokrazia eta herrien eskubideak errespetatuz, hala nola askatasuna eta legitimitatea defendatzeko”, Ukrainak jasaten duen kanpoko eraso baten aurrean.

Zentzu horretan, ordezkari jeltzaleak defendatu egin ditu Europar Batasunak Ukrainako gerraren arduradunei jarritako zigor gogorrak eta laguntza humanitario eta finantzario posible guztia, inbasioa eta tropa errusiarrak berehala bertan behera uztea, gerra krimenak jazartzea, eta nazioarteko estamentu guztiek inbasioak eragindako gerra kalteak ebaluatzea, Vladimir Putin presidente errusiarrak eta bere konplizeek Errusiatik paradisu fiskaletara bideratutako diruarekin ordain ditzaten.

EH Bilduko eta Elkarrekin-Podemoseko talde parlamentarioen jarrera ere kritikatu du ordezkari jeltzaleak, neurri horiek Eusko Legebiltzarrean ez babesteagatik, Putinen aurkako zigorrak eskatzeari uko eginez. “Ez dituzte gerra eta gizateriaren aurkako krimen ugariak salatzen. Nazioarteko Zuzenbide Humanitarioa errespetatzeko besterik ez dute eskatzen”, esan du.

Zentzu horretan, Aguirrek adierazi du EH Bilduk eta Elkarrekin-Podemosek ez dutela uste Ukrainak bere burua defendatzeko eskubiderik duenik, ezta lagundu ahal zaionik ere, adibidez, defentsarako armak bidalita. “Haien arabera, badirudi beren biztanleria guztia masakratzen utzi behar dugula. Baina bere historian lehen aldiz, EBk mekanismo bat jarri du martxan erasoa jasan duen herrialde bati laguntza militarra bidaltzeko. Ni pozten naiz horrek suposatzen duenagatik, Ukrainarentzat bere burua defenda dezakeelako eta inbaditzailearen aurrean aurre egin dezakeelako", nabarmendu du.

Euskadi-Ukraina 

Ukraina-Euskadi Elkarteko ordezkari bat Eusko Legebiltzarrean izan da ostegun honetan, eta Maitane Ipiñazar eta Iñaki Aguirre EAJ-PNVko legebiltzarkideekin biltzeko aprobetxatu du. Bilera horretan, jeltzaleek babes osoa eman diote Ukrainako herriari, eta bertatik bertara ezagutu dituzte euren herrialdetik alde egin behar izan duten milaka errefuxiatuen egoeraren azken berriak.