EAJ-PNVk baterako gobernantzan oinarritutako lan-eredu bat eskatu dio berriro Espainiako Gobernuari, Europako funtsen ahalmen eraldatzaile guztia ondo aprobetxa dadin. Gaurko osoko bilkuran, Itxaso Berrojalbiz legebiltzarkideak azpimarratu du oso garrantzitsua dela Euskadi bezalako eskualdeen esperientzia izatea proiektu estrategikoak eta etorkizunekoak aurrera ateratzeko. Elkarrekin eta koordinatuta lan egiten bada, etorkizuneko belaunaldien onerako izango diren jarduera-ildo eraginkorragoak garatuko ditugu. "Euskadi lehiakorra da, industria aurreratua du, I+Gn eta sektore traktoreetan asko inbertitzen du eta funtzionatzen ari den lankidetza-eredu publiko-pribatua du. Euskadi irteera-posizio abantailatsuan dago gaur egun, eta posizionamendu hori aprobetxatu egin behar dugu eraldaketarako". Eskualdeen eginkizun aktiboaren erreklamazio horrek badu bere euskarria, Berrojalbizek gogorarazi duen bezala, Berreskurapen eta Erresilentzia Mekanismoen Erregelamenduan (BEM) bertan. Erregelamendu horren arabera, eskualdeetako eta tokiko agintariak bazkide garrantzitsutzat hartu behar dira aurreikusitako erreformak eta inbertsioak ezartzeko orduan. Lankidetza, adostasuna eta kodiseinua aktibatzen ez baditugu, "Europako funts guztiak ez aprobetxatzeko, epe laburrean arreta gehiegi jartzeko eta etorkizuneko ekonomiaren teknologien trena galtzeko benetako arriskua egongo da", ohartarazi du.

Gaur egun, Europako funtsak dira Covid-19aren ondoriozko krisiak mundu mailan uzten digun erronka gainditzeko tresnarik "anbiziotsuenak eta garrantzitsuenak". Batasunaren eraikuntzan mugarri izan dira, Berrojalbizek esan duenez, eta benetako batasun politiko, fiskal eta bankarioaren lorpenean izan lezaketen papera azpimarratu du, erakunde komunei subiranotasun nazional handiagoa emanez. "Euskadi Europar Batasuneko gainerako estatuekin berdinduta dagoen subjektu politikoa izango den Europa bat, Europa sozialagoa eta iraunkorragoa bilatuz, eta Europako funtsen Araudia bi ideien nahasketa nahiko zorionekoa da", adierazi du.

Eztabaidan zehar, EAJ-PNVko ordezkariak EH Bilduri aurpegiratu dio Madrilera euskal agenda bateratua eramatea eskatzea, Euskadin akordioari uko egiten diotenean, eta Kongresuan politika egiten duten eskuzabaltasun bera lehenik Legebiltzarrean egitea eskatu dio. "Denbora asko daramagu euskal agenda defendatzen Madrilen, ez da ordezkatzen dudan alderdi honen agenda, herritarren agenda baizik. Eta agenda hori hemen hasten da. Etxean jokatu behar da lehendabizi, Madrilera orain arte inoiz ikusi ez den eskuzabaltasunez joan aurretik. Baina argi utzi diguzue EAJri urik ez, eta horrela oso zaila da elkarlanean aritzea", gaineratu du.

Azkenik, Legebiltzarreko Osoko Bilkurak jeltzaleek eta sozialistek sinatutako zuzenketa, ondoren PPrekin adostua, babestu du. Zuzenketa horretan, Espainiako Gobernuari eskatzen zaio Next Euskadi programan jasotako proposamenak gauzatzean autonomia-erkidegoen parte-hartzea barne hartuko duen lan-metodologia bat taxutu dezala.