Enplegua izan da nagusi gaur Eusko Legebiltzarreko osoko bilkuraren lehen eztabaidan. Lehentasunezko gaia da EAJ-PNVrentzat, eta ahalegin guztiak egingo ditu datozen urteetan. Horrela, Jon Aiartza legebiltzarkideak berretsi egin du Iñigo Urkullu lehendakariaren konpromisoa, hots, Euskadiko langabezia-tasa %10etik beherakoa izatea. "Une zailetan lortzen badugu, berriro lortuko dugu. Aurreko krisian erantzun genuen eta berriro egingo dugu", adierazi du.

Baina sortzen den enplegu kopurua garrantzitsua izanik, Aiartzak Euskadin sor daitekeen enpleguaren kalitatean jarri du arreta. "Ez dugu edozein enplegu nahi. Enplegu duinak nahi ditugu, lan-eskubideak dituztenak eta behin-behinekotasun gutxiagorekin. Kontratu egonkorrak eta luzeak, pertsonei etorkizun duina ziurtatuko dietenak". Baina, zeregin horretan, guztion parte-hartzea eta lankidetza behar dugu, eta Administrazioa kalitatezko enplegu egonkor hori sortzen lagun dezakeen eragileetako bat denez, norabide berean arraun egin behar dugu alderdiek, eragileek eta erakundeek. "Etorkizuna lankidetzatik bideratu behar dugula uste dut, eta ez banantzetik. Garai zailak datoz, garai zailak bizitzen ari gara. Aktibo bat izango litzateke Legebiltzarreko taldeek eta herrialdeko eragile ekonomiko eta sozial guztiek parte hartzea. Guztioi dagokigu ahalegin handiagoa egitea. Administrazioei, noski, baina baita gainerakoei ere. Lankidetzarekin eta koordinazioarekin, erantzuna eraginkorragoa izango da ". Aiartzak zalantzan jarri du EH Bilduk eztabaidan izan duen jarrera "apurtzailea", eta bere ordezkariei galdetu die ea gai honetan ere "izkina batean" geratuko diren, "Besoak gurutzatuta, dena zalantzan jarriz eta edozein akordio boikotatzen saiatuz. Egiten dutena egiten dutela, guk lanean jarraituko dugu".

BERPIZTU PROGRAMA, ENPLEGU-ESTRATEGIA

Gobernu honi dagokionez, Aiartzak azpimarratu du Jaurlaritzak oso ondo zehaztuta duela ekonomia suspertzeko eta kalitatezko enplegua sortzeko estrategia. Ibilbide-orri horrek bi oinarri nagusi ditu: Gobernu Kontseiluak asteartean bertan onartu zuen Berpiztu programa eta 2020-2030 Enplegu Estrategia. "Euskadi eraldatzeko eta etorkizunerako prestatzeko bi programa dira. Horregatik uste dugu garrantzitsua dela, eta hala adierazi du Gobernu honek, inplikatutako sektore guztien inplikazioa izatea. Izan ere, denek dute zeregin bat, eta Gobernua animatzen dugu haiek kontuan har ditzan", gaineratu du. Aldi berean, funtsezkotzat jo du bi tresna horiek enplegu duina, soldata duinak eta lan-eskubideak defendatzea. Printzipio horiek "Euskal erakunde guztien politika publikoen zeharkako ardatz" izan behar dutela azpimarratu du.