Joseba Egibar EAJ-PNVko bozeramaileak azpimarratu du "sinbolismoa" dela lehendakariak "Gernikako arbolaren aurrean, euskal herritarren askatasunen ikurra baita", urte bukaerako mezua eman izana, "Herri honek bere etorkizunaren jabe izan nahi duen egungoa bezalako une batean".

Lehendakariaren urte amaierako mezuaz egin duen balorazioan, Egibarrek adierazi du harekin bat datorrela euskal erakunde-esparru osoak aurre egin beharreko erronka nagusiak identifikatzeko orduan: erronka demografikoa, ekologikoa, ekonomikoa eta baita politikoa ere.

Erronka politikoari dagokionez, Lehendakariak "ezberdinen arteko akordioak bideratzeko deia" egiten duela esan du. "Baina argi dago akordioak gauzatu ahal izateko borondatea ez ezik, proiektu politikoak lortzeko baldintza berdinak ere egon behar direla, denok izan behar ditugula joko-arau berberak, ezin dira ez betorik ez debekurik izan", azaldu du, "eta hortik etor daiteke adostasun, lotura eta akordio jakin bat".

"Eta, horretarako, funtsezkoa da lehendakariak gure etorkizunaren ardura hartu nahi dugula esatean egiten duen erabakia, eta, gure etorkizunaz arduratu ahal izateko, ezinbesteko tresnak behar ditugu, erronka horiei guztiei aurre egin ahal izateko, dela ekologikoa, dela demografikoa, dela migrazioarena", azpimarratu du. “Azken batean, garapen ekonomikoa, justizia soziala eta subiranotasun politikoa oinarri hartuta, guztion artean euskal herritar guztien etorkizuna garatu eta ziurtatu ahal izatea da helburua", amaitu du.