Euzko Abertzaleak taldeko ordezkariak gaur eguerdian izan dira Eusko Legebiltzarrean Manchesterreko erasoaren biktimengatik dolumina eta elkartasuna adierazteko egin den elkarretaratze isilean. EAJ-PNVk eraso hau gaitzetsi du eta biktimei,senideei eta Britainia Handiko herritar guztiei adierazi die bere babesa eta elkartasuna. “Gure elkartasuna adierazi behar diogu britainiar herriari eta, oro har, Europako gizarte osoari, bizimodu baten kontra eginiko erasoa izan delako, gure balore eta printzipioei eginiko erasoa. Europako hiritar garen aldetik argi izan behar dugu atentatu honek zer suposatzen duen. Demokrazia eta giza eskubideak errespetatzeko baloreak indartu behar ditugu” adierazi du Iñigo Iturrate legebiltzarkideak.

EAJ-PNVren aburuz Manchesterreko erasoa pertsonen askatasunari eta beren aisia bizitzeko erabakitzen duten moduari eginiko eraso zuzena izan da. “Askatasun pertsonalak auzitan jartzen guztietan, eta horixe da hemen gertatu dena, ez dugu amore eman behar. Guztiok, erakundeak eta gizarteak, derrigortuta gaude eta irmo jarraitu behar dugu giza eskubideen, demokraziaren eta askatasunaren defentsan”.