EAJ-PNVk zuhurtzia, ardura eta diskrezioa eskatu ditu prozesuaren amaiera behin betiko armagabetzea aldebakarreko eta egiaztagarriaz amaitzeko. ETAk gaur bertan egindako adierazpenaren  aurrean, Iñigo Iturrate parlamentari jeltzaleak esan du guztiok espero dugula talde armatuak duela bost urte eta erdi hartutako konpromisoa bete dezala: berehala armagabetu dadila eta, horren ondoren, desegin dadila. “Duela bost urte eta erdi daramatzagu oraingo une hau eskatzen. Larregi kostatu zaigu hona iristea eta ez dugu hori arriskuan jarriko. Ez diogu ETAri eskerrik eman behar, ETAk zor dio gizarte honi bakea eta barkamen-eskea”.

Iturratek adierazi du armagabetzearen ondoren ETAk pausu bat gehiago eman eta azkar disolbatu beharko duela. “Hori guztia gertatzen denean, herri honen bizikidetzarako aukera berriak izango ditugu. Itxaropenerako eszenatoki berri baten aurrean egongo gara, aspaldi-aspalditik euskal gizarteak eskatzen zuen eszenatokia. Herri honetan hain beharrezkoa zaigun bakea eta bizikidetza eraiki ahal izateko bide berriak antolatzeko aukera izango dugu”.