Euzko Abertzaleak talde parlamentariak bat egin du Iñigo Urkullu Lehendakariak gaur antolatutako ekitaldiarekin,Euskadin pertsona errefuxiatuekiko dugun konpromisoa gogoratzeko eta Europar Batasunari eta estatuetako gobernuei erantzun azkarra, eraginkorra eta bateratua eskatzeko,  benetako larrialdi-egoera honen aurrean. Ekitaldian, Amaia Arregi legebiltzarkideak, pertsona errefuxiatuen eskubideen defentsarako taldearteko parlamentariko kideak, euskal erakundeak eta gizarte zibila animatu ditu lanean jarrai dezaten, “bizikidetzaren, errespetuaren eta behar duten guztiak laguntzearen benetako kultura” sustatzeko. Arregik neurri proaktibo eta imaginatiboak garatzeko beharra nabarmendu du, lagunduko digutenak elkartasunarekin dugun konpromisoari erantzuten; horien lekuko jarri ditu Lehendakariak iragarritako bisa humanitarioak. 

Ordezkari jeltzaleak balioan jarri du euskal aldundiek, udalek eta gizarte eragileek egindako lan koordinatua, pertsona hauen integrazio sozialerako. “Guztion zeregina da, eta eskutik helduta aukera bat eta bizitza hobea eskaini behar diegu ankerkeriatik, gerratik eta sufrimendutik ihesi datozenei. Euskadi herri solidarioa da eta justiziaren, gizatasunaren eta Giza Eskubideen errespetuaren balioak elikatzen jarraitu beharra daukagu”. 

Arregik Europar Batasunak eta estatu-gobernuek emandako erantzun eskasa galdegin du, eta aldaketak eskatu dizkie, duela urte eta erdi sinatutako harrera-konpromisoak betetze aldera. "Europa eta espainiar Gobernua konpromiso horietatik oso urrun daude, eta erantzuna premiazkoa da. Iaz 5.000 pertsona baino gehiago hil ziren Mediterraneoan, gehienakgatazka belikoetatik ihesi. Horrek mugiarazi behar gaitu”.