EAJ-PNVko legebiltzarkideek Martxoaren 8ko Emakumearen Nazioarteko Eguneko hamar minutuko kontzentrazioa babestu dute, “Nosotras paramos” proposamena dela eta. Horretarako, talde guztiek adostutako Adierazpen Instituzionala irakurri dute Eusko Legebiltzarreko kanpoaldean, egoera injustiak argitara emateko eta konponbiderako beharrezko aldaketak eskatzeko.

Adierazpen instituzionalak nabarmentzen duenez, “demokrazia ezin da eraiki emakumeak gabe; beraz, guztiok egin behar dugu lan emakumeen eta gizonen arteko berdintasun eragingarria eta benetako berdintasuna lortzeko baldintzak bermatzen dituzten politikak bultzatzen, arlo guztietan”.

Adierazpenak jarraitzen duenez, “denok egin behar dugu lan emakumeen eta gizonen arteko benetako berdintasunaren alde, erakundeetatik eta gizartetik bertatik, lanaren banaketa ekitatiboa eta enplegu duina lortzeko, arretako eta zaintzako lanak eta aisialdiko denbora partekatzeko, afektibitatea eta sexualitatea modu anitz, aske eta seguruan bizitzeko, estereotipoak eta rolak gainditzeko, sexu-erasoen eta eraso sexisten aurka borrokatzeko, matxismoaren aurka egiteko errotik, prekarietateak eta pobreziak emakume-aurpegia izatea saihesteko, eta erabakiak hartzeko garaian guztiok parte hartu ahal izateko beharrezkoak diren baldintzak sortzeko”.