EAJ-PNVren eta PSE-EEren legebiltzar-taldeek bi ekimen erregistratu dituzte Eusko Legebiltzarrean, bere baitan bi Ponentzia sortze aldera, Euskadiren Autogobernua eguneratzea eta Memoria eta Bizikidetza aztertuko dituztenak. Horrela, iragan astean bi alderdiek adostutako konpromisoetako bi bete dituzte. Ganberako Mahaiak, gaur goizean bilduta, bide eman die bi legez besteko proposamenak tramitatzeari, bilkurak eztabaidatu ditzan.

Bi legebiltzar-taldeen ustez, “alderdi guztiak deituak daude elkarrizketarako eta ulermenerako espazioak erraztera, adostasun zabalak eraikitzea ahalbidetuko digutenak, pluraltasuna eta proiektu-aniztasuna errespetatuta”. Ildo horretan, Eusko Legebiltzarra eta Ponentziak, baldin eta sortzen badira, “tresna egokiak dira akordio-eszenatoki horretara iristeko”. Jeltzaleek eta sozialistek aitortzen dute eztabaidagaiek duten garrantzia hain da handia, ezen beharrezkoa izango dira “lan asko, malgutasun politiko handia eta elkarrizketa asko”.

Legez besteko bi proposamenak tramitatzeko onartzearekin, Eusko Legebiltzarrak horiei bide eman die, Bilkuraren irizpena jaso dezaten. Ekimenak hurrengo bilkuraldian eztabaidatuko dira.