Eusko Legebiltzarrean gaur goizean izandako eztabaidan, talde jeltzalea ados agertu da EGA azterketetan lortzen diren emaitzak hobetu beharraz. “Euskararen ezagutza egiaztatzeko sistema bere osotasunean hobetzeko lan egin beharra dago, baita EGA ere”, adierazi du Garbiñe Mendizabalek. Nolanahi ere, EAJ-PNVko ordezkariak gogoratu du “dagoeneko Eusko Jaurlaritza badiharduela lan horretan”. Hile hasieran, Baliozkatzeen Jarraipenerako Batzordearen bilera batean erabaki zuen gai horretako aditu-talde bati eskatzea euskararen egiaztatze-sistema guztiak berrikustea (EGA, HAEE, Osakidetza, Hezkuntza…). Helburua da, besteak beste, Europako Hizkuntzen Markora egokitzea. “Aurrera egin eta hobetu nahi dugu, baina seriotasunetik eta zorroztasunetik egin beharra daukagu”, zehaztu du. Bilkuran egindako hitzaldian, Mendizabalek argi utzi nahi izan du EGA titulua hizkuntza gaitasun oso handiari dagokiola, eta ez dela Administrazio osoan eskatzen den ziurtagiria. “Guretzako, garrantzitsuena da ez da titulu bat, baizik eta gero eta gehiago izan daitezela euskara ikasi eta eguneroko bizitzan erabiltzan duten pertsonak. Titulu bat ez da beharrezkoa naturaltasunez moldatzeko”.

EAJ-PNVk testu bat adostu du sozialistekin eta EH Bildurekin, PPk eta UPyDk ere babestu dutena. Bertan, Eusko Jaurlaritzari eskatzen diote Ganberan aurkez ditzala aditu-talde bati eskatutako berrikusketa-lanen ondorioak.