EAJ-PNVren legebiltzar-taldeak aurkako botoa emango dio diru-sarrerak bermatzeko errentarako sarbide-baldintzak aldatzea helburu duen Herri Ekimen Legegilea tramitera onartzeari.

Amaia Arregi legebiltzarkideak baieztatu duenez, ekimenaren helburu bakarra gizarte-prestazio honetarako sarbidea gogortzea da. Halaber, gogoratu du jatorria Javier Maroto Vitoria-Gasteizko alkate ohiaren adierazpenetan dagoela, Marotok laguntza hauekiko iruzurra etorkin kolektibo batzuekin lotu zuenekoa.

EAJ-PNVk errespetua adierazten die proposamen hori sinatu zuten pertsona guztiei, baina bere ezadostasuna adierazten du muinean ezkutatzen denarekin: gizarte babeserako sistema mugatzea. Sistema hori bakarra da Estatu osoan eta Europako lurralde aurreratuenen parekoa da. Horregatik guztiagatik, legebiltzar-taldeak tramitera onartzearen aurka bozkatuko du.