Eusko Jaurlaritzak emaniko datu hauek azaldu zituen Josu Erkoreka Eusko Jaurlaritzaren bozeramaileak eta Ricardo Gatzagaetxebarria Ogasun Sailburuak, bideo-konferentzia bidez ospatu zen Gobernu Batzordea amaitutakoan eskaini zuten prentsa agerraldian. Atzoko bileran teknologia berriak erabili izan ziren Iñigo Urkullu lehendakaria eta Arantza Tapia Garapen Ekonomiko eta Lehiakortasun Sailburua Mexikon helburu komertziala duen bidaian daudelako.

Inbertsio errealek 526,6 milioiko kopurua egingo dute, pertsonal gastuak 1.961 milioi hartuko ditu eta transferentzia,diru-laguntasun eta gastu arruntek 3.203 milioiko partida egingo dute. Gastu sozialak 2015eko Kontuen % 75 hartzen du.

Datu azpimarragarrienen artean esan daiteke Enplegu eta Gizarte Politiken Sailak bere aurrekontua % 11,5 igo duela eta Diru Sarrerak Bermatzeko errentak eta Etxebizitzarako Prestazio Osagarriak ere "hazkunde nabarmena" izan dutela, 2015erako Kontuen Egitasmoan islatuta geratu denaren arabera.

Beste alde batetik, Osasun Sailak 3.400 milioi euro izango ditu, iazko aurrekontuan baino 36,3 milioi gehiago, Osakidetza elementu nagusi gisa hartuta. Hezkuntza, Hizkuntza Politika eta Kultura Sailak % 1 igo du bere aurrekontua.