ETB-1 eta ETB-2 telebista kateei eskainitako elkarrizketetan, Atutxak esan du Gure Esku Dago ekimenaren arrakasta ez zela izan " jende asko biltzeagatik soilik", baizik eta baita   "belaunaldi ezberdinen artean eta jai giroan egin zen ekitaldia izan  zelako eta sentsibilitate ezberdinak batu zituelako . Ona ere bada, alderdietatik harago,  gizarteak antolatzeko eta ekimenak martxan jartzeko gaitasuna duela erakustea, gizarte bizia dela erakusten duelako". Giza katean parte hartu duelako Popular eta sozialistek EAJ-PNVren kontra esan dituzten kritikez galdetu diotenean Atutxak argi hitz egin nahi izan du " EAJren apustua argia da eta 118 urte daramatzagu horrekin. Guk ez dugu inoren eskutik joan behar gure herriaren etorkizunaren aldeko bokazio eta ikuskera erakusteko. Eusko Legebiltzarrean ere  estatus berria lortzeko bidean sentsibilitate guztiak bateratu nahi ditugun moduan, ez dugu inolako arazorik erabakitzeko eskubidearen alde eskua emateko. EAJk ez ditu aldatu ez bere irizpidea ezta bere estrategia ere ez. Guk gure bidetik jarraitzen dugu. Eskua eman diezaiokegu elkarri Gure Esku Dago ekimenean, eta autogobernuaren ponentziaren barruan jarrai dezakegu lanean, eta Quiroga andreak bere kritikekin erakusten duena  baino jarrera askoz ere baikorragoarekin" .

Atutxari galdetu diote Carlos Urquijo Espainiar Gobernuaren ordezkariak Gure Esku Dago ekimenaren kontra egin dituen kritikez. "150.000 pertsona bakean elkartu eta manifestatu direnean balorazio negatiboa egitea... Uste dut horrelako egintza batek errespetu handiagoa merezi duela Espainiar Gobernua ordezkatzen duenaren aldetik. Zoritxarrez, Urquijok ez du sinesten eta ez dio axola herri honen gehiengoak sinesten duenak eta oso argi dauka Euskadiren etorkizuna Espainia handi eta askearen barruan dagoela" .

BBBko presidente andreak  Juan Carlos I.aren abdikazioaren iragarpenaren ondoren Espainian errepublika eta monarkiaren artean ireki den debatea baloratu du " Debatea apurka-apurka isildu da alderdi handiek ez dutelako eztabaida horretan sartu nahi. Espainiako alderdi handiak ez daude beren Estatu ereduak behar duen erreforma handiari ekiteko edo erantzuna eman behar zaien errealitate nazionalak ikusteko prest”. Gai honetan gehien harritu duen gertakaria azaltzea eskatu diotenean Atutxak zera erantzun du " Harritu izan nauena izan da aste bete daramagula militarrez jantzita ( Juan Carlos I.a eta Felipe Borbon) ikusten. Izan daiteke ospakizun militarrak izan direlako, baina harritu egin nau" .

Atutxak era berean konfirmatu du  EAJ eta PSE-EE alderdien artean hasiera bateko akordioa dagoela  BBK banku fundazio bilakatzeko. Lortu zen akordioaren bidez, Gizarte Ekintza blindatuko da eta fundazioak gizartean dituen erroak mantentzea eta  fundazioaren eta Kutxabanken kontrola Euskadin geratzea bermatuko da, fundazioa Kutxabanken akziodun nagusia izango delarik. “BBKren inguruan PSErekin hasierako akordio bat dago eta PPk Vital Kutxari buruz mantentzen duen jarrera ezagutzeko zain gaude, baina uste dut hiru alderdien arteko akordioa lortu ahalko dugula".