GBBko presidente eta EAJ Legebiltzar Taldeko bozeramaile den Joseba Egibarrek ETAren amaiera moteltzea egotzi dio Espainiako Gobernuari. “ETA bizirik dagoela irudikatu nahi du arazo politikoari ez eusteko eta PSE eta PPren gainbehera ekiditeko”, argudiatu du.

Madrildik aurrerapausorik ematen ez bada ere, ETAri armak entregatu eta erakundea desegiteko eskatu dio. Bide horretan, berretsi du EAJ-k espetxe politika berri baten alde egin eta bakea eta bizikidetza bultzatzen jarraituko duela Legebiltzarrean eratu den batzordearen bidez. Eztabaida gune honetatik kanpo gelditu diren PSE eta PPri “beldur eszenikoa gainditu” eta elkarrizketa gunearekin bat egiteko gonbitea luzatu die, “Legebiltzarrean ez bada, elkarrizketa beste guneren batean egin beharko delako”.