Joseba Egibarrek, GBBko presidente eta EAJren Legebiltzarreko bozeramaileak, ziurtatu du bere alderdiak parte hartuko duela Gipuzkoako aurrekontuen eztabaidan, euskal erakundeei egonkortasuna emateko helburuaz. Onda Vasca irratiari eskainitako elkarrizketa batean azaldu du EAJ “koherentea” izango dela Iñigo Urkullu Lehendakariak legegintzaldi hasieratik egin duen apustuarekin: “eztabaidan egongo gara eta ez dugu parte hartuko estrategia bateratuetan ezta zentsura mozioetan ere”. Egibarrek argudiatu  du  EAJ eztabaidan izango dela, Bilduk ez dezan aurrekontuak luzatzeko “tentaziorik” izan. “Ez da komeni politikagintzan horrelako aukerak eskaintzea”, gehitu du.

Hori argituta, burukide jeltzaleak salatu egin du Martin Garitano Gipuzkoako ahaldun nagusiaren jarrera, Batzar Nagusiei “entzungor egin eta errespetua faltatzeagatik”. Bere ustetan, Bilduko agintaria “ez da joko parlamentariora ohitu eta ez du onartu gehiengo minoritarioan gobernatzen duela”. Hori islatzeko, Garitanoren Exekutiboak muzin egin die oposizioak egindako hainbat eta hainbat eskariri, atez atekoaren aurka eta bidesariak zabaltzearen aurkakoei, Egibarrek gogoratu duenez. “Ohitura onartezina da Garitano buru duen Aldundiak hartutakoa”, ziurtatu du.