"Egoera anakronikoa bizitzen ari gara. Hala adierazi genuen 2009. Urtean, Bateragune auzia hasi zenean eta hala berresten dugu gaur: bultzada politikoa izan duen zentzugabekeria judiziala da", adierazi du EAJ Legebiltzar taldeko bozeramaileak, Joseba Egibarrek, Auzitegi Konstituzionalak Bateragune Auziko bost  zigortuak behin-behinean aske uzteko defentsak aurkeztu zuen eskaera atzera bota duela jakin ondoren.

Egibarren ustetan, Baltasar Garzon epaileak abiatu eta Barne ministro zen Alfredo Perez Rubalcabak onartutako “dena ETA da axiomak” ondorio “zitalak” ekarri ditu eta “justifika ezin den egoera delikatua” sortu du.  “Zentzugabekeria hutsa da ETAko kide izateagatik epaitu, zigortu eta atxilotzea beren erabakien bidez ETAk aktibitate armatua uztea erabakitzea ahalbidetu zuten pertsonak”, argudiatu du EAJ Legebiltzar taldeko bozeramaileak.

Hori dela eta, Egibarrek ebatzi du “zentzuzkoa eta bidezkoa” litzatekeela Arnaldo Otegi, Rafa Diez, Sonia Jacinto, Arkaitz Rodriguez eta Miren Zabaleta berehala aske uztea.