Mari Carmen Liñares EAJko legebiltzarkideak adierazi duenez, Europar Batasuneko Batzordeak nekazaritza-politika bateratua aldatzeko asmo du. Aldaketaren bidez, bertan behera geldituko lirateke, 2015eko irailaren 30etik aurrera, azukrearen kuotak eta, ondorioz, salneurri minimoen erregimena. Kuotek eta salneurri minimoek eutsi diote erremolatxaren eta azukrearen ekoizpenari Europar Batasunean, eta haiek bertan behera uztea zenbait herrialde ekoizlerentzat bakarrik izan daiteke interesgarria, besteak beste, Brasilentzat, munduko esportatzailerik nagusiena baita.

Azukrearen kuotak kentzeak Arabako eta Estatuko erremolatxa-sektorearen ehun ekoizlea desegingo luke, eta ekoizte hori estrategikoa da sail ureztatu handiak dituzten eskualdeen ekonomia eta enplegurako. Batzordeak berak eraginari buruzko azterketa batean onesten duen bezala, erreformak modu esanguratsuan eragingo lioke Espainiari, erreforma aplikatzeak erremolatxaren desagertzea ekarriko bailioke gure Estatuari, baita 20.000 ustiategi suntsitzea ere, gehienak Andaluzia, Gaztela eta Leonen, Gaztela-Mantxan, Euskadin eta Errioxan.

Gainera, kontuan hartu behar da azukrearen mundu-kontsumoaren urteroko hazkundea hiru milioi tonakoa dela eta Espainiako Estatua defizitarioa dela arlo horretan: azken urteotan 500.000 tona ekoitzi dira; kontsumoak, aldiz, milioia gainditu du.

Hori dela-eta, Euzko Abertzaleak taldearen proposamena onartuta, Jaurlaritzari eskatzen dio:

1.   Defenda dezala erremolatxaren sektorearen kuotei eusteko beharra Espainiako Gobernuaren aurrean, Europar Batasunaren aurrean eta parte hartzen duen erakunde eta organismo guztien aurrean.

2.   Egin dezala azterketa bat, legez besteko proposamen hau onetsi eta sei hilabeteren barruan, kuotak desagertzeak Arabako erremolatxaren sektoreari eragingo dizkion ondorioei buruz. Azterketa Ganbera honetan aurkeztuko du.