Legebiltzarkide jeltzaleak gogoratu duenez, bera Erakunde eta Herrizaingo Batzordeko Mahaiko Idazkari den aldetik, erakunde horrek Oxel Erostarbe legebiltzarkideak agerraldia eskatzeko aurkeztu zuen eskabidea errefusatzeko hartu zuen erabakiaren kontra agertu zen. “Zentzuduna den ororen kontra egiten da “ espainiar administrazioaren menpeko kargudunek legebiltzar honen aurrean agertu beharrik ez dutela” argudiatzean, Gobernuaren ordezkariak Espainiar Ejertzitoak Elgetan apirilaren 24an, Intxortaren 75. urteurrenean egin zituen maniobra militarren inguruko azalpenak eman ez ditzan” azaldu du. Izan ere “printzipio horri jarraiki, ez litzateke agerraldi eskaririk onartuko, Araudiaren arabera, Ikerkuntza Batzorde kasuetan salbu, hiritarrek, elkarteek, ordezkari instituzionalek ez baitute agertzeko derrigor juridikorik; egiten badute izaten da erakundearekin lan egin nahi dutelako edo Euskal Ganberari errespetua adierazteko, bera delakoan herriaren borondatearen adierazpena” gaineratu du.

Mª Eugenia Arrizabalagak azaldu duenez “ egia da, zentzu orokorrean, beste erakunde batzuetako ordezkari politikoei Ganbera aurreko azalpenik ez eskatzeko printzipioa errespetatzen dela, baina tratu hori udal eta foru ordezkari kasuetan mantentzen da, azalpenak beren udal osoko bilkuretan eta foru erakundeetan eman behar dituztelakoan”. “Baina hau ez da Gobernuaren Ordezkariaren kasua, duela gutxi, Legebiltzarrera joan zelako, bere ustez euskal administrazio maila ezberdinen artean ematen diren  bikoiztasunen inguruan duen ikuspuntua azaltzeko    -eta, horiek denak, bere eskumenetik kanpokoak izanik-, eta esan egin zuen bikoiztasun hori ez dela ematen berak ordezkatzen duen estatuko Admininistrazioarekiko”, gaineratu du.

Arrizabalagaren esanetan “apirilaren 24an Elgetan Espainiar Ejertzitoarekin gertatu zena nahikoa larria da Urquijo jaunaren agerraldia eskatzeko, batez ere kontuan hartzen badugu Diputatuen Kongresuko Mahaiak ez duela inolako presarik Defentsa ministroak Kongresuko Euzko Abertzaleak taldeak egin dion galderari erantzun diezaion. “ Esan beharko ote dugu Elgetako hiritarrek eta oro har euskal hiritarrek ez dugula  PP alderdiko Gobernuaren ordezkariari   Espainiar Ejertzitoak   egun hain esanguratsuan gipuzkoar herrian agertzeko izan zituen arrazoiez galdetzeko eskubiderik? ”, galdetu du. “Hori ote da Alderdi Popularraren eta Alderdi Sozialistaren gardentasuna?”, amaitu du.