Eusko Legebiltzarreko Lurralde Antolamendu, Garraio eta Ingurumen Batzordean “Trenbide Sozialerako Sarea”ren arduradunen agerraldiaren aurrean, Juan Antonio Arieta-Araunabeña, EAJ-PNVren legebiltzarkideak, Eusko Jaurlaritza euskal trenbide sare berriaren proiektua eraginkortasunez eta adostasunez kudeatzen ari dela iritzi dio. “Zilegitasun osoa duen proiektua da, euskal instituzioen, Gobernu espainolaren eta Europar Batasunaren babesa baitu”, gehitu du.

Informazio eza eta EAEko garraioaren etorkizunari buruzko eztabaida sakonaren falta somatzen dutenen aurrean, EAJ-PNVk uste du, bestelako foro eta ekimenak errespetagarriak direla eta ekarpen aberasgarriak egin ditzaketela baina instituzioen balio demokratikoa ezin dutela inolaz ere ordezkatu. Zentzu horretan, “etorkizunari begira eta proiektua aberastu bidean, Eusko Jaurlaritzak elkarrizketaren atea zabalik izango du gizarte eragileek behar adina ekarpen egin ditzaten”, zehaztu du Juan Antonio Arieta-Araunabeña, Nacionalistas Vascos- Euzko Abertzaleak Taldearen legebiltzarkideak.