Joseba Díez Antxustegi EAJ-PNVren Eusko Legebiltzarreko bozeramaileak Imanol Pradales Lehendakariarekin izandako bileraren balorazioa egin du gaur arratsaldean. Bilera hori Pradalesen beraren ekimenez Legebiltzarreko alderdi politikoekin egindako erronda baten barruan egin da. Ordezkari jeltzaleak Madrilen eta Euskadiren artean politika egiteko orduan dagoen aldea azpimarratu du Lehendakaritzan egindako hitzaldian. "Espainiako politikan egunero ikusten dugun ikuskizun lotsagarriaren aurrean, bereziki tristea uda honetan; izan ere, suteek herriak kiskaltzen zituzten bitartean eta herritarrak sufritzen zuten bitartean, Madrilgo alderdietako buruzagi nagusiek trasteak burura botatzen zituzten eta elkarri irainka hasten ziren, aldiz, Lehendakariak liskar horietatik ihes egitea hautatu zuen. Martxan dagoen eta norabide argia duen Gobernu baten buru da, baina eztabaida alderdikoi zentzugabeen aurrean elkarrizketarako bokazioarekin. Erronda honek argi uzten du", laburbildu du Diez Antxustegik. Euskadin dagoen egonkortasun politikoa ere aldarrikatu du, Frantzian gertatzen ari denaren moduko egoeren aurrean.

EBBko burukide ere badenak gogorarazi duenez, Pradalesek, agintaldiko lehen urtean, herritarren kezka nagusiekin bat datozen estrategiak jarri ditu abian: “osasuna, etxebizitza, segurtasuna, industria, euskara, hezkuntza...”. Horiek dira, hain zuzen ere, Lehendakariak eta Antxustegik gaur arratsaldean Gasteizen egin duten bileran jorratu dituzten gai nagusiak. “Jendeari interesatzen eta kezkatzen zaizkion gaiak ekartzen ditugu politikara, kaleetako elkarrizketak betetzen dituztenak. Era berean, erronka horiei aurre egiteko proposamenak egiten eta ekimenak abian jartzen ari gara, eta horixe egiten jarraituko dugu legegintzaldiko bigarren urte honetan”.

Bozeramaile jeltzaleak, halaber, Basque Segurtasun Foroan laguntzeko prest dagoela adierazi dio Lehendakariari; eta Eusko Legebiltzarrean izapidetzen hasi den Etxebizitza Lege berriaren garrantzia azpimarratu du, bi adibide aipatzearren.

Diez Antxustegik autogobernuaren esparruan ahalik eta akordio zabalena lortzearen alde egin du, Madrilen dagoen aukera leihoa aprobetxatzeko, eta Gobernuak Estatuari egindako eskakizuna babestu du, egin gabe dauden transferentziak ahalik eta lasterren bete daitezen.