EAJ-PNVko legebiltzarkide Jon Aiartzak  Espainiako Gobernuari  berriz ere eskatu dio "konpentsazio funtsa eratzea, lan bizitza osoan amiantoa moduko substantzia toxikoaren eraginpean egon diren pertsona guztiekin dugun zorra ordaintzeko". Aiartzak azaldu duenez helburua da kalte ordaina ematea eta  pertsona hauek hamar urte iraun dezakeen prozesu judizial "malkarra" sufritu behar izatetik libratzea. Aiartzarentzat, Estatuak Europako herrialde gehienek  kalte ordain hauek emateko mekanismoak sortzeko hartu duten bidetik joan behar du. “Urte asko daramatzagu atzeratuta, gehiegi, eta horregatik Gorte Nagusietan artikuludun testua aurkeztuko dugu eta, borondate politikoa baldin badago, bozkatu eta berretsi baino ez da egin beharko ”.

Ekimen legegilea iazko maiatzean Euskal Ganberan aho batez onartu zen ekimenaren antzekoa da.  Iaz ere, Legebiltzarraren oniritzia jaso ondoren, proposamena Madrilera bidali zen baina Kongresuaren Mahaiak ez zuen izapidera onartu  aurrekontuetako gastuen kapitulua aldaraztea suposatzen zuela argudiatuta. “Gaur testua berregin dugu, aitzakiarik egon ez dadin eta, atzerapenik gabe, funtsa sortzeari ekin diezaion”, azpimarratu du Aiartzak.

Legebiltzarkide jeltzaleak  gogora ekarri ditu Eusko Legebiltzarrak  Gorte Nagusietan funts hau sortzea bultzatzen daramatzan urteak. “Lana eginda eramango diegu, idazkera osatuta egongo da Frantzian arlo honetan garatu diren konpentsazio politikak erreferentziatzat hartuta. Madrilera behar bestetan joango gara Kongresuak eta Senatuak biktima hauei kalte ordaina emateko beharra aintzat hartu arte ”.