“Albiste ona da euskal herritarrentzat, Jaurlaritzak gizartearen ongizatea ziurtatzeko baliabidea izango baitu herriaren erronkei aurre egiteko”, esan du Iñigo Iturrate legebiltzarkideak.

Jeltzaleen ustez, PSErekin sinatutakoa 2013an, bi alderdien artean adostutako egonkortasunerako akordioaren ondorioa da. Hitzarmen hori –Iturratek dioenez-, “etorkizunera begira eta hurrengo urteetako ekintza-politikoetan oinarrituta zegoen. Akordio horren zehaztasun ekonomikoa da gaurkoaren albistea”.

EAJ-PNVk nabarmendu egin du sozialistekin akordioak indartuko dituela Urkullu lehendakariaren exekutiboak egindako aurrekontu-proiektuaren bide estrategikoak; baita ere, egungo legegintzaren hasieratik adierazitako helburuak. “Helburu hori krisialdia gainditzea baino ez da, baita enplegua sortzea eta zerbitzu publikoei eustea ere: osasuna, hezkuntza eta gizarte-babesa. Gure akordioak politika horiei eustea ahalbidetuko du”.